English Translation

Uvani Ulukhaktuumi 1960 mi 70 milu, titiraujaqtumik hanaujaqpakhutik. Hanaujarviqaqhuni hanaujaqtik uvani Holman Eskimo Co-operative ukuak Peter Aliknak Banksland (1928–1998) unalu Agnes Nanogak Goose (1925–2001) munarivlugillu nanminirijangit titiraujaqtunut qaujihaqtit pivalliavlutik arlingnaqtumik aallatqiingujut hanaujarniq. Itqaumajaujut tahapkuat ingilraraaqpaktut hanaujaqtit inuuraaqhimajut iluani hanaugaangit uvani kinguvaavullu hanaujaqti titiraujaqpaktuq avgugiiqhimajumik arlingnaqtumik uvanngat titiraujarningit ilitquhiita kakiniitigut. 


Peter Aliknak Banksland Hannaijaqtut Iqalukhiuqtunut (1999) Ujararnut mingukhutik unalu titiraujaqhutik 38 × 57.3 cm IHUMAGIJAAT WINNIPEG ART GALLERY

“Nunatuqaujangit, aappaavit hivulliqpaaq ablurvingat hamaniittut... tutihimalraaraluaqtangit maniraa,” pangnaarjuga uqaqhimajuq uvamnut nipikittumik iklautigivluniuk. Nipaa tuharnaqtuni tahivluni kigutingmingnut uqangillu qungalligaangami itqaumavaktara aappangma. 

Angangma Angus attangmalu Mary-m nukaralu uvangalu pihuujaqhuta haniani King Kangiqhua uvuni hivullipta inuuniarvik najuqtangat qangaraaluk pulaaqtaqput Ulukhaktok, Inuvialuit Nunanga Aviktuqhimajumi, NT uvani Imaruqtirvia 2017 mi. Nukara uvangalu pulaanraqhugu aappangma, Bill Natkusiak Aleekuk, inuguqhimavinga. Aullaqhimavluta Edmontonmit, nunagijaptingnin, uqariiqhimangmagu aappapta timinga arjangit iluviqhimajaami haniani angajuqaapta. 



Agnes Nanogak Goose Tuunngali’p Hakugingningit (1973) Ujararnut hanaugaq 61 × 45.7 cm IHUMAGIJAAT WADDINGTON’S

Tadja timikkut hamaniiqatigingitkaluaqhuni, aappaga uvangalu huli katilviunginnaqtugut avvautigiikhugu atinga Natkusiam. Taamna atiq ilitquhirijaat kinguvangit aappangma: Natkusiak, uuminngaluuniit “Billy Banksland,” aappangma ataattianga [1]. Alaskamit inuuhimajuq qitiani 1880 mi, Natkusiam munarivagait aallagiit Canadian Arctic Expedition qaujihaijut taimaa qaujihaijit qilalugaqhiuqtillu aullaaqatigivagaat Nunaptingnun. Ilagiingillu hivulliuvlutik ingilravakhutik uvunga nunamut haffumani Ulukhaktokmi uvani 1930 mi amihuujut Inuinnaitut, ilittuqhimajangit ulamnilaittuuvluni anguniaqtiujuq, naniriaqtiujuq unalu qaujihaqtiuvlunilu. 

Pihuujaqhuta kaiviqattaqhuta kangiqhuanut tatpaunga majuqqamut tautukhugu inuuniarvik (hamlet). Nuvungmi nutqaqhuta tautukhuta itqaumaliqhugulu, humiliqaa tamaat arliruhukhutik, mikijunnuaq atauhilik tingmiannuaq tuharnaqiyuq hilami. Tingmiaq puqtuhivluni qilamik qunmunngaqhuni qupanuatut numiqhuni tatpaunga qilangnunngarmijuq. Tingmiaq qunniarnaqtuq nunalingnut uvanngat ajuitpiaqtuq tingmialik, quvianaqhunilu tautukhimagaptigu. majuqqanmit arlingnaqhunilu tautungnaqtuq. Uvamnit, tingmiaq tautungnaqtuq arlingnaqpiaqhuni itqaumaliqhugulu ubluata Aappaangnut Ublua. 



Unagurvia haffumani Natkusiak Ulukhaktokmi, 2017 PIKSAUN HANAUJAQTI

Aappangma qangaraalungmi havakhimainnaqhuni tingmialiqivluni. Ingniqutiliqijiuvluni, havakhimmaaqhuni taimaa gavamanit havaaqaliqhuni aanniqtailinirmut pilirijiuvluni uvani Agjaqtuliqijit Kanata. Havaangit havakpaliqhuni amihunut nunalingnut, ilagijangit tamarmik Tununnganaq unalu Hivuraanut Nunangani amijuujut nunalirjuanut akunngani. Qaujimajunga apirijauvlunga uvani Antarctica mi, aappangma unipkaaliq- paktuq haffumani qaukkat tingilailat (Emperor Penguin) amihuarjungit. 

“Pinniqpiaqhutik, qanikkuuraangat kihimi ilittuqhimajat kuinginnaq- piaqhutik mamaittuuvlutiktauq,” uqaliqpaktuq, iglahainnaqhuni. 



Peter Aliknak Banksland Numiktik (Qilaudjaqtuq) (1995) Titiraunmut 45 × 60.5 cm IHUMAGIJAAT WINNIPEG ART GALLERY

Aappaga alianaqtumik inuuhiqaraluaqhuni qaffiujut akiharnaraluaqhuni ilaliutijangit annaihimajangit Ilihariaqtuqhimavluni. Tiguaqtauhimajuq uvanngat Aleekuk ilagiiktut qaujimmakhimavluni talvanngat Aleekuk atinga tigummiinnaqhugu tamainnut inuuhirmingnut. Kihiani pamiqhimajangit najatka uvangani Aleekuk atinga atuqhugu, itqaqhimavlugulu Banksland ilagiingit. Ilagijavut, ukpiqhimajaqqut qaangiraangangni atiq hivullivut angajuqqaapta, tiguaqhimainnaqtatit inuuhingit taimaa itqaumajangillu ingilraraaqpakhutik. Arliruhuliqpaktara aappaga piqpagiinnaqhugit nunamunngaulihaaraangami taimaa itqaumainnaqhugu ativut, Natkusiak [2]. 



Peter Aliknak Banksland Kapoktok (1995) Qijungnut hanahimajuq unalu titiraujarniq 62 × 49 cm IHUMAGIJAAT CANADIAN ARCTIC PRODUCERS

Tautuqqaaqhuni tingmiaq qunniarnaqtuq, attaga pangnaarjugalu takukparumavlugu iluvirvia hivunigijumajaatigut hivullivut angajuqqaavut. Najaga uvangalu nanngarivlugu tautukhimajavut iluvirvingat najugaat ilakput ilagivlugulu malruk hivulliujut hanaujaqtiugaluat ikpingnaqhuni, Aliknak najaalu Nanogak. Aliknak, uuminngaluuniit Peter Aliknak Banksland (1928–1998) [3], aappangma ataattatiaraluanga najaalu Nanogak, uuminnga- luuniit Agnes Nanogak Goose (1925–2001). Irniraluanga panigaluangani una Natkusiak, Aliknak unalu Nanogak tamarmik nalunaitpiaqtut hanaujaqtiugaluaqtut ikajuqhimagaluaqtut nautkaqhimajaat haffumani Holman Eskimo Co-operative 1960 mi atulihaaqtumi. Una kuapak akhuuqhimmaaqhutik ikajuqhugit Inuit hanaujarnigut nautkaivlutik havaangit niuviqtittugit hilarjuarnut maniliuqhimajut nautkaivlutik maniliuqtumik nunalingnit. Tamarmik Aliknak unalu Nanogap makpiraangit hanaujarniagut huli arliruhukpagaannga hamna ajurnaittumik pinniqutingit. 

Pihuujaqhuta iluvirvingnut pulaaqhuta tamainnut hanningajulik taiguaqhimajut atiita una angangma Angus unalu Attaga Mary unipkaaliqhugit ilavut katilviuhimajut tamainnut. Talvangaanit itqaumaliqhugit paaqhimajavut hivunngani atauhiq hanningajulingmi titiraqhimajuq “Billy Natkusiak Banksland – Ubluqtuhinia 19, 1948 – Okpaktunga.” Taimaa anirnirnigut arliruhuliqhunga ikpigivlugu mihigivlugu kinguani, ublungani unalu hivunikhavut atauttimut mihingnaqhuni. Taimaa ikpigiliqhugu qangaraalungmi huurimna utiqhimaliqtunga hivulipta inuudjuhianut kihimi utirmijunga hivunnganut qilamiuqtumik. Talvanngat tunihijara ukpiruhuutiga taamna atirma tigumiarapku atiq Natkusiak kihimi tigummiinnaqtara anirninga taimaa. 



Agnes Nanogak Goose Tigujauhimajuq Aivirmit (1985) Ujararnut hanaugaq 43 × 61 cm IHUMAGIJAAT WINNIPEG ART GALLERY

“Uvangaujuq,” nipaittumik uqaqtunga uvamnut. “Aappaga... tamainnaujugut.” Tuhaumalaaqtunga uvamnut, “Arlingnaqtuq ai? Tamapta hamaniittugut.” 

Pulaaqhimagapta 2017 mi, utitqinngittunga Ulukhaktokmut, kihimi utirniarmijunga. Inuudjuhitka uvani Ulukhaktokmi ikpigilluaqhimajara inuuhira. Ilittuqhimajunga ajuqhaliraangama, ingilravaktunga hivunigivlugu hanaujarnirnut taamna mamiharnaqhuni tahiuqtauvakhunga munarija- uvlunga. Aappangma inuuhuiqhuni ukiuqaliqhunga twenty-sixmi, uummatiga hiqumittuni. Ilittuqhimajunga uvamnik ihuaqtumik nakuuqpiaqtumik ilittuqhimajukhauvlunga ikpiguhungniitka talvangaanit hivunigivlugillu akhuurniitka tautungnaqtumik hanaujarnirnut qanga-raaluk ikhinnaqhimainnaqhugit nautkaijumavlunga. Titiraujaliqhunga hungmalliqaak taimaa titiraunmut alilajumullu titiraujaliqhunga. Hivunngani, aadjiliuqhugit titiraujarningit Amialikanmiut kakiniit, uuminngaluuniit tautungnaqtut titiraujarniq, uuminngat imarmiujut ivitaalgit minguut taimaa pivallialiqhunga nanminirijatka takunnaqtut inuuhiptingnit ublunganit Inuvialuk. Una hanaugaq kakiniliurniq ilitturnaqhuni tautungnaqtut haffuminngat utuqqaujut umiat, kihait, nauttiat, unalu takunnaqtut arnat, pilautit, niaquit unalu uummatit, takunnaqtut talurmit uvanilu utaqqiivingmi makpiraat haffumani kakiniqarviit. Itiinnarialik niuvirumajut ajurnaittumik pukuhimalaaqtut tiliugainik uvannga talurmit kakiniliurniq, uumminngaluuniit nunamiunit kakiniliuqti. Nanminirijatka havaarijatka utiqtiqpakhugu ihumaliuqtatka nanminirijatka tutqirnaqtut, haffuminngat uluit, aqpiit, iqalukpik, unalu anngutikhait anguniaqpagatka uuminngaluuniit hinnaktuumajatka. 



Kyle Natkusiak Aleekuk Uuktuutinirnut Ilagiiktut (2020) Imarmut ivitaalgit 22 × 28 cm HANAUJAQTIP IHUMAGIJAAT

Tatuinnaqhugit havaangit haffumani Aliknak unalu Nanogak pinniqutauvlutik taluit iglungma ingittinnanga mingutinnangalu. Aimavingmi nivinngaqhimajut malruk Aliknak’ap titiraujaqhimajangit, Numiktik (1995) unalu Mannikhiuqtut (1992), unalu atiliuqhimaittuq nivinngaqhimajut hanaugait Nanogak, tamaat hanaugait katilviuhimajut uvamnut taipkununga unalu Ulukhaktok. Uvani Numiktik angut tigumiaqtaa qilaut hiitqungillu aurangajuq numiqhuni una arnaq tautukhugu haumingmit atauhiq itigaa nuvuaniittuni iluani talia tunuaniittuni qitianit, timingit tautukhugu qilaut. Tautukhugu titiraujaq, ihumagivlugu uummatingit tigliqtut avvautigiiktut aippaariik — itqaumainnaqhugu uvanga nuliaralu inuuhiqpullu avvautigiiktavut atauttimut. Uvani Mannikhiuqtut, malruk inulrammiit angutit aannuraaq- himajut taatqijaanit hungajaaqtuq unalu quriiqtaq puhitalik tautukhimajut algangillu hiitqungillu, paanguqhutik ivajunut amigaittut manniit. Angijaaqtut qungallittut akuliangit pivlugit iijingit, itqaumaliqhugulu qungalligaangamik ilatka mannikhiuliraangamik upinngaami pulaaqhugu Ulukhaktok. Uvanittauq nivinngaqhimajut taatqijaanit hungajaaqtuq kalikuq haffumani Nanoga’p hanaugaa, takunnaqtuq urjuit, harimahukhuni arnaq itikkangit abluqhimajuq talingillu haniraanmiittut. Puhitaa atigimi qulaaniittuni anuqhiqpallaarmat.

Takunnaqtut itqaumavlugit tahapkuat titiraujaqhimajut aappangma inuuhuirmat, tautuliqhunga aadjigiiktut ukunanngat ilitquhingit unalu angiklivallialiqtuq pivitka. Aliknak unalu Nanoga’p titiraujaqhimajangit havaangit tuharnaqhutik ilitquhingit unalu amijuujut tautungnaqtut. Tamarmik atuqhimajut ivitaangit pinniqhivlutik – naitkaluaqhugit pinniqutingit ilitturnaqtuuvlutik—unalu nautkaqhimajut taunungaraaluk ikhinnainnaqhugu ihuittumik inikhaa alilajumik pinahuaqhutik nanminirijaanit ilitquhia aadjigiiktumik tahapkuat kakiniit atuqtangit uvinirnut ikajuutauvlutik tautungnaqhunilu manirainnaat ivitaangit.



Agnes Nanogak Goose Nakuujumik Anguniaqhimajuq (1973) Ujararnut hanaugaq 43.8 × 58.4 cm IHUMAGIJAAT WADDINGTON’S

Taamna atauttimuuqtut haffumani malruk titiraujarningit ilitquhiat— una titiraujarningit pinniqtumik haffumani Aliknak unalu Nanogak unalu tautungnaqtut haffumani Amialikan kakiniit—pivakhuni puigurnaittumik qaliriiqhimajuq havaara unalu uvinima. Piqaqtunga malruk Alikna’p tiliugaat kakiniqhimajuq talirma nanngarivlugu anirninga: Numiktik unalu Kapoktok (1995). Kapoktok, takunnaqhuni malruk ajurnaitpiaqtumik iqalukhiuqtit nangiqhimajuk hapunmi, itqaumavikhaanit ilitquhingit-unipkaaqhimajuq itqaumavlugit hikumi aulattivlutik pangnaarjutka Ulukhaktok uvani Kanatami Nunaqaqaaqhimajunut Inungnut Ubluata 2017, tahamani amigaittumik iqalukhimavlunga. Numiktik takukhauvluni atauttimuuqtut hakugiktumik ikpiguhuktatka nuliarma uvangalu-uummativut tigliktut inuuhira. 

Uvani mingukhimajatka, ihumainnaqhugit nalrujut, maniraa unalu tautungnaqtut haffumani kakiniit takunngaqtut uvani imarmit ivitaalgit unalu India minguutingit titiraujarnahuaqhugit tautungnaqtut ilitturnaqtut pitquhira unalu inuuhira ihumagivlugu Inuvialuk. Aadjigiikhugit hivunigijaat haffumani Alikna’p unalu Nanoga’p titiraujaqtangit, akhuuqhunga ihumagivlugit inuuhingit Inuvialuktut kinguani, ublunganit unalu hivunnganit inuuhingit. Numikhimajatka tahapkuat nanminirijatka, kakiniit-ihumagijangit iltquhiat, himmauhiqhugillu arnat Iqaluit unalu pilautit takunnaqtut ilitquhilingnit nanminirijamingnit pitquhiq unalu anirniagut takunnaqtut haffuminngatut uluit, angatkuq, unalu inukhuk. Atuqhugit aadjikkutaanit takunnaqtumik, aippaqainnaqhugit hunanik una ulu qaumajumik ivitaalingnit nauttiat, hanaujaqhugit ilitquhiat nalrujuniillu. Havaatka hivumuuqhugit takunnaqhutik ilagiikhutik takunnaqtut Inuit unalu ilitquhilingnit inuuhingit hanaugait hulidjuhiat ukuninngat anirnirnut tahiuqtaatigut munarijaatigut hunaniglu anguniaqpagavut niqikhamik. 



Natkusiak, “Billy  Banksland,” qinmiatalut Mike uvani M’Clure Ikirahak, Nunakput, 1916 IHUMAGIJAAT CANADIAN MUSEUM OF HISTORY PIKSAA GEORGE H. WILKINS

Ataattatiarma unalu Nanoga’p inuuhingit tautungnaqhuni hanaugaanit, tautukhugit anguniarniq inuuhirilluaraluangit ilagivlugu hanaujaqtatka malikhugit, ilittuqhaivlugu hanaujatka, anirnirma unalu qanuq ilagiinnaqhugu hilarjuaqput avataaniittuq uvamnit. Utiqhunga Ulukhaktokmit Albertamut, talvanngat tupaummiliqhunga anirnianut Natkusiak inuuhingillu haffumani Aliknak unalu Nanogak uvamnit ilittuqhimalihaaqhunga anguniariami. Haffuminngatut Natkusiak, qaujihaliinnaqhunga avatingnut haniptingni iluani aimavingmi nunalluarma, unalu angiklijuummiqhutik ilaqatigiiktunut uvanngat uvamnit manirarlu anngutikhaillu tautungnaqtut hivunikhanut nanminirijatka unipkaarijatka unalu mingukhimajatka. 

Hivunikhangit atuinnaqhugit havaamingnit kinguani inuudjuhirijangit, uuminngaluuniit “quvianaqtumik anguniarvingit maniraat” taamna uqauhirijatka. Talvanngat ukpirijara aappangma, ataattiarma unalu ataattiarma aappaa unalu aallat itqaumajaujut. Taikunngaruma, niriurijara ilitarihimaniaqtaat kakinitka kinaujaakhaat ilihimaniaqtaannga.



Kyle Natkusiak Aleekuk Tiliuqhimajangit uvannga Ihumamikkut (tukinga) (2020) Imarmut ivitaalgit 22 × 28 cm HANAUJAQTIP IHUMAGIJAAT

Tukiliuqhugit ilitquhirma Inuvialuk inuuhimajuq hilataanit Inuvialuit Nunataarvia Nunangani taimaa akiharnaqhivaktuq—taamna ilittuqhimajara arlingnaqhunilu. Itqaumainnaqhunga uvamnut haffumani Natkusiak qanuq ingilravakhuni Alaskamit, qaujihaqhuni ukunanngat qaujihaqtit ikajuqhimavlutik nunaliuqhuni Ulukhaktok. Taamnalu itqaumainnaqhunga una Natkusiak inuuhimajuq nutaaqpiarmik timinganit, annaivluniuk Ilihariaqhimalraaqtuq, nalvaaqhunilu nakuuqpiaqtumik tingmialiqinirmik iluani uvamnut, Kyle Natkusiak Aleekuk. Atuinnaqtatka hunanik angmaumainnaqtut pivalliajaami anirninga Natkusiak ublumimut tadja atuqtavut unipkaaqhugit unipkaangit, tuhaqtittugu uvuuna hanaujarnigut, aullaaqhunga nutaamut nunamut ilauqatigiikhugillu tamainnut inuuhimajut ilitquhingit. Una atiq qulaanunngaqhugu majuqqanut uvanilu kiglinganut nunarjuarnut. Inuuhira unalu timiga kalikuungujuq anirniuvluni, Natkusiak, hanaujaqtiujuq. 

NOTES

[1] Ilitturnaittut qanuq Natkusiak turaarviujuq imaatut “Billy Banksland.” Una atiq ilitquhirluanga uvannga hulivakhuni ilauqatigiinnaqhugi Inuinnaunngittunut qaujihaqtit, qaujihaijunut unalu qilalugaqhiuqtut havakhuni aviktuqhimajumi. Nalunaittuq una atiq “Banksland” tiguaqhimajaat hamna Natkusiak anguniaqtiuvakhuni naniriaqtiuvlunilu uvani Banks Island mi.

[2] Attiqtuiniq malikhimajangit aadjigiinngittut tamainnut Inuit nunaliit uuminngaluuniit

ilagiiktunut ilitquhirijangit.

[3] Aliknak, havaangit ilaliutijangit iluani Holman Ukiunnguraangat Titiraujarningit Kititiqhimajangit uvanngat 1967-1994, aallatqiingujut nalunaiqhimajaujut Alec Aliknak Banksland, Peter Aliknak Banksland unalu Aliknok tamainnut kititiqhimajangit titiqqanmit.

Taana unikkaaq sivulliqpaamit takuksautaulauqtuq ukiaksaarmit 2020 tititraqtajuviniq Inuit Sanaugangittigut.